我也算“说书先生”咧

钱孟林

说书志格行当我从来勿曾学过，勿过讲故事倒还来是佬。随便听别人讲一个故事之后，我能够完整格讲出来。有辰光我还拿别人讲格精彩故事记下来，譬如常州卜灵望故事，九龙壶故事等，勿过志格多是几十年前头格老话，勿讲咧。

说来也巧，2009年3月，机械一村社区开设全市唯一格社区书场——青松书场，我成只书场召集人兼义务“说书先生”。勿过，我一直搭大家讲，我勿会说书，顶多是讲故事。我先后自编七个常州历史故事讲拨大家听，社区居民说叫“蛮好听格”，我就觉得来劲佬咧。从前年10月份开始，我就嘞书场开讲“常州白泰官”，到介歇一共讲只十五场咧。

我讲“常州白泰官”还有点来头得。因为我搭原常州评弹团团长周玉峰老早就认只佬，社区成立书场前，我还请他来作过指导，他送拔我一本《周玉峰话本选，龙城山海经》，书当中有“常州白泰官”格头五回，后来，我就开始讲咧。有则现成话本。用勿着编写故事咧，我省力不少嚼。勿过，我也是70岁上头格人咧，又勿曾学过说书，介歇是“老来学皮匠”。为则讲好“常州白泰官”，我花勿少功夫嚼。先要拿话本看三五遍，再嘞开讲前练好几遍。因为话本写只好，再加上我下只功夫，所以开讲“常州白泰官”以后，书场格听众一回回多出来，我也蛮高兴格。讲到后来，我勿定心咧。囊为?因为《龙城山海经》书当中只有头五回，虽然书上格一回，我能讲两场，但总归要讲完格，这个办呢?后来听说周玉峰还出过一本书，上头有后六回话本，勿过制格辰光他已过世，急撒人啊!有一天我突然想到，市图书馆有个“常州人著作室”，可以去查一查。果然我嘞过海点看到一本《周玉峰评弹作品选》，赶紧翻一遍，嗨呀，书当中有“常州白泰官”第六回到第十回。我只格高兴啊!勿过，一歇歇高兴劲头就过去格咧。囊为?因为图书馆又勿卖书，制本书我到囊嗨点去取得到呢?真是“踏破铁鞋无觅处，得来全不费工夫”。有一天，几位评弹票友到青松书场来演出，在交谈中我讲到制桩事体，一位姓金的票友说，我家嘞可能有制本书嚼，勿过要仔细寻寻嚼。春节前，到荷花池街道老年公寓演出，老金真佬拿制本书带来拔我，我高兴到则连声道谢。制本书真佬是“及时雨”啊，从去年3月中旬开始，我就是照则制本书开讲格，话又要说家来咧，“常州白泰官”一共有35回嚼，前10回讲完则，后头这个办呢？

3月8日那天，我专程到市文化馆拜访许建荣馆长。一来因为他是常州市非物质文化遗产保护中心的主任：热来因为他的父亲许玉泉是常州头一个拿白泰官故事搬上舞台的人。我当然要去求援啊，制一次拜访收获真佬大透佬，头一是晓则周玉峰格“常州白泰官”完整话本近期就要出版，我吃则一颗定心丸咧。再有是许馆长主动表态：我搭你约一约，让我父亲搭你好好叫谈谈。你说说看，我会勿高兴伐!

我当场表示：一定好好叫向许老先生讨教说书格过门关节，我能得到名师真传，决不会“老来学皮匠，越学越勿像”，我相信会越学越像样格，

两年多来，我一勿当心也算是格“半箩拖”说书先生咧，也成则常州非物质文化遗产保护项目“常州白泰官”格推广人咧，嘿嘿!