扛头扛脚

杨仲文

上海闲话当中，多少有眼寻开心（戏谑）格辰光，会得讲一句：“扛头扛脚。”啥个叫扛头又扛脚呢？原来是讲老底子人死脱，要进三块长板两块短板合成个棺材里去个辰光，如果有两个儿子（女婿也可以称半子），一个扛死人头一个扛死人脚，拿伊摆进去，格末迭个人就是享受到了天大个福气，功德圆满，鸿福齐天了。当然，这个入棺仪式当中，真正动手操作的是殡仪馆的仵作工人，儿子女婿只是旁边做做样子搭搭手，也就意思到了。但是，却在这个扛头扛脚过程中，传承了千百年来中国人老祖宗的伟大正能量，“百善孝为先”啊！

格日天我刚进厂门口就俾厂工会主席吴光一把拖牢，伊讲：“小伙子，来得正好，有桩特殊任务交俾侬，倷特技车间底人头子侪活络来西……”

上影厂设有特技车间多年，在全国甚至国际上都有点小名气。特技车间在美国叫做特殊效果工场，近年来有了电脑图像处理利器，但凡科幻、战争大片，都要由特殊效果工场参与主要制作才能票房赚得满盆满钵。中国的电影制技，传统上讲究多、快、好、省的原则，当年摄制组讨论分镜头剧本时，碰到难题了总归会讲一句：“迭只镜头交俾特技，伊拉总归有办法解决！”

吴光交给我的任务的确十分特殊，厂里制片部门格场务大毛师傅昨日半夜里走脱了，伊一径睏勒只小搁楼上，今朝火葬场车子来，讲：“格个哪能弄法？人哪能弄得下来！”家属只好打电话到厂里来要求组织上帮忙解决，讲：“大毛师傅人还挺勒搁楼上下弗来……”格种事体真是千年难板碰着一趟，正想派大毛师傅格徒弟强强去看一看，见到我厂门口进来，工会主席吴光就一把拖牢临时拉个差，多个人去靠得住点。老实讲我长介大，从搁楼上弄个死人下来格事体从来听也呒没听说过，心里勿想去，嘴巴上就讲：“我车间里还呒没进去过……”吴光讲：“侬尽管去，我会得对车间里关照。”迭辰光边啷立个厂党委书记丁一同志就讲：“去吧，去看看怎么个情况，代表我们领导去关心一下老工人同志。”

她开口我就没话讲了，丁一同志是老延安，十四岁参加革命，出席过党的“七大”，是个的的括括的马列主义老太太，在上影厂威信极高。文革当中狂飙骤雨排山倒海，丁一同志当然首当其冲。当时哪怕厂里最结棍的造反派对她还是非常讲政策，弗要讲吃生活挨打，就是肮里肮三的闲话也呒没一句。可见得正如老爷叔刘琼讲格：“有辰光还是搭侬平常做人有关系啊！”老头子会得做人，文革当中真呒没勒厂里吃过生活（挨打），顶顶肮里肮三格闲话就是批判伊是“阿飞导演”！直到今朝我还弄弗明白，伊哪能是“阿飞导演”呢？批伊“老克勒导演”嘛还讲得过去点。

我同强强一人一部脚踏车沿淮海路从徐家汇朝东踏，心里有点忐忑不安，嘴里对强强有一句呒没一句讲：“大毛师傅就住勒阿拉后弄堂，早点打只传呼电话过来嘛，我也用勿着现在再赶转去多跑一埭……”强强心里大概也对弄死人格事体呒没数，嘴巴里“呣、呣”应了我，脚底下只管用力踏脚踏车。两个人一前一后踏到襄阳南路，再转弯就到了钱家塘，进到弄堂口只见得挤满了人嗡牢子。迭日天勿是礼拜天哪能会得有介许多人看热闹呢？原来迭辰光上海（全国）电力供应还是蛮紧张，勿像今朝如此充足，商场大楼里、地铁站大厅，冷气足得热昏，到处电灯开得锃锃亮。当时为了节约用电计划用电，全上海工厂需要条块分区定厂休日脚，并勿是大家侪休息正礼拜，而是一个礼拜七日天天天有工厂单位休厂休。所以钱家塘蹲勒屋里厢底人能够出来格，侪挤到大毛师傅迭条弄堂里来了。再讲钱家塘大弄堂是南北通，北面淮海路，南面南昌路，上海人习惯穿弄堂抄近路，格末走过的路人驻足停步看脱一歇也有勿少。当年日常生活勿像今朝如此绚丽多彩、五彩缤纷，难板碰着一趟事体平常看勿大到，总归免勿了轧轧闹猛，围观老正常。

我同强强两个人排开人群锁好脚踏车进到大毛师傅屋里，只见伊个独养囡圄阿兰同个娘哭得昏天黑地。伊拉认得我迭格老邻居，趁两个人哭得吃力停一停歇口气格辰光，我连忙讲：“强强是厂里大毛师傅格徒弟……倷停歇哭，让阿拉先解决问题，弗来三再打电话转去厂里……”此时，一众人等都立刻把目光向上，看牢大毛师傅睏的搁楼。

上海的居住问题是个历史悠久的难题，聪明的上海人早就发明了搁楼来扩展多摆一只床的立体空间。想象一下，脑洞也用勿着吃力来西大开大合，拿长途旅游大巴、高铁动车、甚至飞机座位上头只行李架放放大，摆到屋里墙角落头同样位置就是了，老实讲还真呒没做得介考究，只要勿坍下来压着下头格人就马马虎虎可以了。迭只搁楼大小面积可以睏一个人或者两个人打地铺，高度是勉强普通人可以坐直了，尽量留俾下头多点生活净空高度。搁楼边上钉排稀疏的栏杆，人睏着勿要滚落来，还开个口架一部简陋的竹木扶梯上落，勒全上海多年来就解决了多少大难题。搁楼，就是拿只“楼”搁一搁格意思，迭格挑手旁弗好省，搁楼与阁楼不在一个档次，阁楼是指房屋最顶层一间，天花板是斜顶角，老派外国电影里常常可以见到，英文叫“Loft”，三角形一面墙上开扇窗，上海人就叫做“老虎窗”，迭格是从“Loft”转化过来格洋泾浜闲话。电影里迭种阁楼里总归住个穷大学生、落魄文青或者年青家庭教师，人物身份定了，下头就好做交关小资情调格浪漫故事。

再讲回搁楼，上海的搁楼市面也可以做得交关大，记得淮海路“大方布店”店堂里就做了一只蛮宽舒的搁楼，搁楼上摆了两只写字台，坐了财会人员，各只柜台上空同搁楼吊有粗铅丝相连。下头营业员收了顾客钞票布票小票夹在一只大票夹上，票夹上两只洞洞眼是穿进铅丝里的，营业员用点力“嚓”一声拿票夹顺牢铅丝飞到搁楼上，财会拿钞票、布票、小票从票夹上取下来，噼里啪啦拨动算盘珠，再拿发票、找头夹还票夹上，又是“嚓”一声飞俾营业员交还顾客。迭是交关清爽格流程：钱、物、账、经手人分得清清爽爽，呒没一点猫腻。后来搞技术革新，粗铅丝改粗点格细绳子，绳子连成一个环，通过一只电风扇马达带动，绳子勒拉店堂营业员头上同搁楼财会之间循环流动，票夹就会得自家跑来跑去，听弗见“嚓”一声了。上海人是聪明。

上海还有一个特色建筑，就是二层搁，有点人就呒没看见过了。迭格是拿一楼天花板下头满铺了楼板，里厢弗高格空间同下头完全隔开，再勒上二楼楼梯边墙上适当高度处开只洞，做扇门人好进出。迭间有私密性的房间就叫做二层搁，当然是要另外付房钿了。

讲回到大毛师傅睏的搁楼，我同强强讲：“拿搁楼朝外的栏杆当心点拆脱，就好让大毛师傅下来了。”边啷有位热心邻居是房管处南昌路管养段的，格日天轮着伊休息，伊讲：“也只有实梗（这样）了。”关照阿拉等一歇，马上回房修队去借部扶梯弄两只榔头来。强强蛮懂经，就拿出香烟请殡仪馆两位工作人员抽，让伊拉耐心再等一歇。

过脱一歇家什（工具）来了，我同强强一人一头搭两部扶梯，人手一只羊角榔头，关照强强小心地拆，迭辰光木材供应交关紧张，一点点木头也要凭户口簿申请了买，我想到木栏杆拆下来，晏歇要装还上去派用场，勿好“乒呤乓啷”滥拆。木栏杆拆下来递俾下头格邻居，我再搭强强两个人扶梯上两步，上半身钻进搁楼，拿大毛师傅身上盖个被头，卷卷好伊格人身体，就同强强对看了一眼，稳稳当当地伊扛头我扛脚，一步一步再从木扶梯上落来，迭辰光只听得阿兰母女两家头爆发出惊天动地的哭声来。我搭强强下到地上，再扛了大毛师傅摆到殡仪馆担架上，两位工作人员熟练地用幅白布将大毛师傅连头带脚包好，一抬起，就踏上了钱家塘的弹硌路。阿兰搭娘跟勒后头“呜里哇啦”哭了走，我搭强强两个人低了头跟了走，四个人就送了大毛师傅最后一程。等到目送殡葬车走脱，我才觉得自家背上里厢已经湿了一大片，再看强强，也是一头一面孔格汗，想想大毛师傅又老又瘦，身体弗重格嘛。

大毛师傅走格辰光享受到“扛头扛脚”的殊荣，伊有勿有感觉勿晓得，对于生死，伊倒是看得交关透，伊一经讲：“我已经老早死过一趟了，多赚了五六十年勿罪过。”原来大毛师傅是个奶毛头格辰光，得了重病看看呒没希望了，伊格娘就在家门口摆张骨牌凳，上头搁张圆圆格大匾，拿奶毛头放了匾上头，等伊咽最后一口气，格是左右邻居侪看见，不是做娘心狠，而是实在呒没办法啊！弄堂里底小囡看到了特地绕开走，怕阎罗大王派来讨命格小鬼晦气沾到自家身上，因为活人是看勿见迭两个阴间小鬼格嘛，避避开总归呒没错。有位后弄堂住的阿娘五六十岁了，苏北人，一双小脚，只见得伊走过来抱起垂死的奶毛头，撤去了张匾，自己坐在方凳上，跷起了左脚在右腿上，把孩子仰抱在怀里，一手拿碗米凝汤，一手拿只小调羹，细心又耐心地一口一口喂伊温热的米汤。后来阿娘对人家讲：“是可怜小人不要做个饿杀鬼走在黄泉路上啊。”想勿到格两口米凝汤落肚，小小人缓过气竟然活转来了！阿娘是宝贝啊，当自家肚皮里落下了块肉，大毛师傅也就认了个娘，亲热得勿得了。阿娘生得四个囡圄，走脱格辰光大毛师傅披麻戴孝赛过亲生儿子一样。弄堂里底人侪讲，阿娘做好事有好报，死格辰光福气几化好！再讲转来，因为有了阿娘迭两口米凝汤，大毛师傅才多活了五十几年，伊待阿娘比自家的娘还要孝顺，迭个也是应该。

无独有偶，上影厂到鬼门关去兜一转回转来的还有一个人，就是著名老演员铁牛，他自己亲口对我讲，解放大上海进城来，不料得了时疫上吐下泻十分厉害，送到广慈医院，当时他已不省人事，待得醒来，是在一间空荡荡的大白房间里，身上只盖条被单冻得不行，熬不过就大叫：“快让我出去！冷死我啦……”这才又重新回到病房呆着。有个老护士听出口音跟他认了老乡，像个老姐一样待他很好，只是时不时望着他笑。铁牛忍不住一再追问，她才说：“当时你没气啦，床底下一大滩绿水，就把你推到太平间里去了，不知怎么又把你冻活过来啦。”铁牛说：“当时刚进城，哪里知道医院里放死人的地方叫太平间，更不知道里头有空调，温度那么低，差点没冻死真是命大。”铁牛还对我讲，老护士偷偷对他说：“你应该信天主圣母玛利亚，你的命是他们救回来的。”铁牛对她说：“我是共产党，信那玩意儿干嘛？再说他们是外国人，讲话俺又听不懂，咋信？！”铁牛还说：“那时刚解放，广慈医院里还有很多洋婆子（修女），上海话说得一溜一溜的。”去过鬼门关回来的都赚够本，铁牛胖，血压高，爱吃肉，高寿善终便是又一证。

大毛师傅的肺心病多年，钱家塘对过徐汇区中心医院里急诊抢救过，格日夜里阿兰娘只听见老头子打呼比平常响，想大概日里厢吃力了，早啷头喊伊起来揩面吃早饭，哪晓得半夜里走脱了。走得安详，睡梦中呒没痛苦，人清清爽爽，勿麻烦啥人，格也是求之不得的天大福气。我同强强回到厂里向党委书记丁一、工会主席吴光汇报了“哪能解决问题”，呒没大肆宣扬。以致后来一些同事当中传开来：是我搭强强拆脱了搁楼栏杆，由殡仪馆底人拿大毛师傅尸体搬下来，我也勿想多去解释。但是钱家塘事发现场邻舍隔壁，甚至住了此地勿熟悉的人，好几年了还讲起迭桩，“大毛师傅一个囡圄福气好，有两个男小顽来帮伊扛头扛脚”。当时走进走出钱家塘，我是感觉到交关人指指点点，“迭格就是扛头扛脚格男小顽……”我是心里厢交关受落格。

不过想勿到麻烦来了，因为“扛头扛脚”的缘故，阿兰娘就拿我搭强强当自家屋里人了，先是“做七”吃豆腐羹饭一定会得喊上我搭强强，我搭强强也变得亲兄弟一样。后来住得近嘛，烧好绿豆汤也会叫我走过去吃一碗……终于有一天，礼拜天我勒门口头汰被单，阿兰走过来一言不发抢了，坐勒我只小板凳上头，卷起袖子管拿大脚盆里的被单放在汰衣裳搓板上用力搓，肥皂沫飞得老高，然后再拿到公共自来水大龙头上去过清爽，我只好硬了头皮跟过去。钱家塘并不是家家人家自来水进户入室，大多数用水辰光要买竹筹子去大龙头一铅桶一铅桶拎转来。公用自来水大龙头旁边，平日里就是挤满了一大堆叽叽喳喳快嘴姑娘，还有众人阿姨、舅妈、婶婶，虽然勿好讲伊拉侪是三姑六婆嘛，也是平常忒空嚼舌头的事体来得格起劲，用今朝底闲话来形容，就是钱家塘的公共讯息平台，或者信息中心。今朝底迺么好，我一铅桶一铅桶水盛满了倒勒大脚盆里，阿兰一遍一遍过清水，最后两个人一人一头拿被单水绞绞干。到末脚阿兰昂首挺胸面孔有点红扑扑，拎了装干净被单的铅桶朝前走，我背了只大脚盆赛过乌龟壳一样，低头缩颈跟勒阿兰后头走，格一路从公共大龙头走转来，迺么赛过勒拉介许多邻居老老少少面前唱了一出锡剧《双推磨》哉。

回到屋里我是愁肠百结，勿对头啊，哪能办？果勿其然过了几日天，对过格“新娘子”来对我讲：“阿兰小姑娘对侬蛮有意思嘛。”我马上“接翎子”（充分接受信息）讲：“阿兰是蛮好，不过我勿好做对勿起大毛师傅格事体啊……”看到伊一面孔疑惑我就讲：“阿拉天马电影制片厂一劈两内迁，我挨着了，强强呒没挨着，我马上要迁到成都去做四川人哉。阿兰勿跟我去，此地有个娘，夫妻分居吊八筋，一年只有半个号头（月份）探亲假，全年格辛苦积蓄全部轧勒火车铁轨里。阿兰跟我去，老娘肯定带得去，迺么要拎脱三只上海户口损失几化大！”“新娘子”听到此地，半句闲话也讲勿出，我并勿是忽悠伊，而是老老实实讲俾伊听格桩介严重的事体。当年户籍制度十分严格，不得随意迁徙流动，一辈子死勒一只户口里。上海是特一级城市，待遇供应全国最好，加以上海人几辈子顽固地认为，啥个北京首都，出了上海市区侪是城下头。当时有句闲话讲：“宁要浦西一张床，勿要浦东一间房！”隔条黄浦江望得见的浦东都勿肯去，何况介远的三线地区四川成都了。要讲清楚格桩事体好写厚厚一大本书，所以“新娘子”闲话也呒没多一句就走了。

再过两日我去大毛师傅屋里坐坐，阿兰勿勒屋里，伊个娘讲：“同强强两家头荡淮海路去了。”过一段辰光，两家头就敲定了，结婚之后有了个大胖儿子，后头儿子出牙齿会得叫我“大伯伯”，拉开只嘴巴笑……顺带便讲一句，对过迭位“新娘子”十足已经六七十岁了，不过大家还是叫伊“新娘子”。因为伊年轻嫁过来辰光钱家塘大家勒过苦日脚，长远呒没人家讨新娘子了，好不容易讨进一位新娘子，弄堂里侪高兴，“新娘子、新娘子”叫得起劲，就一直叫到今朝，获得了格终身荣誉头衔。至于后头再讨进来的年轻一点新娘子，顶多喊声新嫂嫂而已。钱家塘里伊是独此一家，别无分出。

等到我美国回来，强强弄大了，自家开了爿“影视文化传媒公司”，拍起电视剧来。一趟请我“苔圣园”吃饭，两杯啤酒入肚伊讲：“阿哥，老早勒厂里阿拉是只鸡，总归有把米吃吃。出来了就是只麻雀，要自家寻食吃，寻勿着就要饿肚皮……”我讲：“阿哥晓得侬有今朝交关勿容易。”伊又讲：“阿哥我记牢侬讲格，艺术可以拿来赚钞票，但是千万勿好糟蹋艺术来赚钞票。我也晓得勒侬眼里，我拍个片子侪是污（屎）一泡，等我筹足了钞票，定规拍一部主旋律正能量足足格上档子艺术片，勿拿票房价值收视率摆勒第一位，一定认认真真去拍，到辰光侬阿哥来做个艺术顾问总策划。阿拉侪是正牌电影厂出来格，自家要对得起自家，对得起厂里厢格批老艺术家……”

伊是我格“扛头扛脚”亲兄弟，我呒没理由勿相信伊，对伐！总归要伸长了头颈等勒嗨。